إختراع النسيان !

رغم إقتناعي الشديد زمان إن مفيش حاجة إسمها نسيان....مفيش حاجة إسمها getting over حاجة أو حد نهائيا....كنت بنصح بيها الناس بس مش مقتنعة إني ممكن يجي يوم أعرف أعملها.....و و انا بفكر في الموضوع أصلا كنت ديما بسأل نفسي : هو أنا أمتي أعرف إني فعلا خلاص
"I GOT OVER IT"
إكتشفت إنه النسيان مش موضوع وقت....ساعات كتير بيعدي عليك وقت طويل بعيد عن الحاجة أو الحد اللي كنت بتحاول تنساه بس مبيجيبش نتيجة....مش عشان الوقت بينسي الناس كلها بس جه عليك و قرر يبقي رخم !
بس عشان الوقت ده بيعدي و انت لسة متمسك بذكرياتك....عاملة زي الجدور اللي لسة رابطاك في الأرض...مش عارف تتحرر منها....بس في نفس الوقت فاكر إنك كدة بتعدي و بتنسي.... ! 
بعد فترة....و بعد ما تعدي عليك سنين كتير و إنت فاكر إنك بطل و خلاص نسيت....تلاقي جدورك في الارض قررت تشدك لتحت و بقوة....إنت مش فاهم هي جابت القوة دي منين....ده إنت كنت فاكر إنك خلاص نسيت ....فتكتشف إن نسيانك كان سطحي....كنت من برة فاكر إنك نسيت....بس الحقيقة إن الجدور قوتها مقلتش ولا لحظة ! مقلتش عشان ملقتش اللي يقف في وشها....ملقتش اللي يقطعها من الارض خالص.....إنت مفيش يوم من السنين الكتير اللي عدت عليك قررت تقطع جدورك فيها....عمرك ما فكرت حتي إن ممكن تكون لسة مربوط بالماضي و الوقت عدي من غير أي فرق !

بس في اللحظة اللي بتواجه فيها الحقيقة دي....سواء بسبب موقف ، مكان ، او حتي شخص يجي يفكرك.....بتبقي هي دي اللحظة اللي بتقرر فيها انك تقطع الجدور ! بتبقي لحظة بتساوي السنين اللي عديتها كلها و انت لسة مربوط بالذكريات.....
و بعد ما بتقرر تقطع الجدور بتكتشف بجد إن فيه إختراع إسمه "النسيان".....بتكتشف القدرة اللي ربنا اودعها فينا إننا ن get over و ميبقاش جوانا ولا حاجة حتي ولو صغيرة !
و ساعتها بس هتتخض من نفسك لما تلاقي نفسك إتحطيت في موقف كان ممكن زمان ميعديش عليك بسهولة خالص...بس دلوقتي عشان مبقاش فيه جدور  ربطاك فبقي أسهل مما يمكن !

خايف أقابله !!

من ساعة وفاة أحمد الجبلي و أنا فيه فكرة واحدة مسيطرة علي دماغي : أنا لو كنت مت الموتة بتاعته دي كنت هبقي مستعدة ؟!
السؤال ده أما اي حد بيسأله لنفسه مهما كان كويس بتبقي إجابته ديما ﻷ.....عمرك ما هتلاقي حد مستعد لمقابلة ربنا....إنت رايح تقابل العظيم...اللي ياما غلط و سامحك...اللي ياما زعلته و كرمك....هقابله بأنهي وش؟؟ ايه يعني عملت ايه في دنيتي عشان استحق أدخل الجنة ؟! طبعا هتقول ولا أي حاجة !
طب استني كدة شوية.... هو انت عملت أيه في دنيتك عشان يرزقك بالصحة و الستر و المال و أهلك و صحابك و كل النعم اللي انت عايش فيها دي !
هو إنت فاكر إنك هتدخل الجنة بعملك ؟ احنا بندخل الجنة بكرم ربنا....عايشين بكرم ربنا....بنتنفس و ناكل و ننام بكرم ربنا....بنفرح بكرم ربنا....و نعيط بكرم ربنا !

هتقولي مانا عارف كل ده...بس برضه...مفيش حد هيدخل الجنة و هو معملش أي حاجة كويسة؟؟ يعني هدخل الجنة عشان كنت بصلي بس مثلا ؟!

هقولك ثانية كدة....ماهو علامة من علامات كرم ربنا هي تسهيل الوصول لرضاه....ربنا مسهلها علينا أوي بس إحنا اللي مصريين نصعبها....عادل و هيحاسبنا علي ذنوبنا اه....بس هو برضه اللي قلنا : "و أتبع السيئة الحسنة تمحها ".....هو اللي بيحسب السيئة سيئة واحدة و الحسنة بعشرة أمثالها....هو اللي لما بتنوي تعمل سيئة و متعملهاش بيكتبهالك حسنة....هو اللي حساباته مختلفة عن أي حسابات دنيوية....عند ربنا 1+1 =  بتعرف تعد لحد كام !!

الفكرة اللي وصلتلها اللي لو عيشنا بيها بجد هنوصل للجنة
"و إتقوا يوما ترجعون فيه إلي الله"
يعني نغير جوانا إحساس "بعد الشر" اللي بنحسه اما حد بيجيب سيرة الموت....نخليه "يارب الجنة"....نشوف سيرة الموت اللي جت في القاعدة دي علي إنها تذكرة....إن ربنا بيحبنا إنه بعتهالنا.....نعيش شايفين اليوم ده و متقيين ربنا.....بنعمل ابسط و أعظم الحاجات عشان نوصل لرضا ربنا.....حتي لو كان إننا نعدي راجل عجوز الشارع !!

الفكرة كلها في إنك تعيش بمنهج "لعلها المنجية" بدل "هو أنا بعمل ايه عشان ادخل الجنة".....تخاف من يوم مقابلة ربنا بس ميبقاش خوف مرضي يخليك مش بتعمل حاجة عشان تجهز لليوم ده...أحمد الجبلي كان متصور عند قبره....كان متصالح مع فكرة الموت...بس مدفنش نفسه بالحيا....عاش و ساب بصمة في الدنيا تجهزه لليوم ده !!

الخلاصة حب الدنيا عشان نعمة من ربنا بس عيش شايف حياتك في الأخرة....زي ما بتحوش عشان تتجوز و تجيب بيت...حوش حسنات عشان تجيب قصر في الجنة.....متقعدش تحسبها كتير....في الأخر إحنا هنعيش و نموت بكرم ربنا.....ربنا اللي مفيش أكرم و لا أحن منه علينا....يبقي مهما ذنوبنا كترت....خلينا نعيش مؤمنين إن كرم ربنا كبير أوي و إننا هندخل الجنة بيه....صدقوني هنرتاح كتير ! 

الحلو هيعيش !!

#الحلو_هيعيش
كنت قاعدة بفتكر يوم من الفترة اللي كانت بعد العملية....و  قد أيه اليوم ده كنت مبسوطة فيه جدا....فعلا كنت بضحك من قلبي....بعد شوية لقيتني بضحك أكتر....أكتشفت إن ده كان أكتر يوم تقريبا كنت تعبانة فيه....ضحكت إني إفتكرت  إحساسي الحلو و نسيت إني كنت تعبانة !
فإكتشفت حاجة.....إكتشفت إن في الأخر الأحساس اللي هيكمل معاك هو الإحساس الحلو.... هتفتكر فرحتك بنجاحك في ثانوي....يوم كنت فرحان فيه اوي مع صحابك....اول يوم قابلت فيه شخص غيرلك حياتك....يوم ضحكت فيه من قلبك من كتر التعب....الإحساس الحلو هو اللي هيعيش....و لو فتشت في الأيام دي شوية اللي كلها مربوطة في ذهنك بإحساس حلو....هتلاقي إن كان فيه إحداث وحشة في اليوم....بس لما إفتكرت اليوم إفتكرت إحساسك الحلو بس و نسيت الوحش  !!
بس الأيام الوحشة مش كدة....الأيام الوحشة بتتنسي.....إحساسنا الوحش اللي حسيناه فيها بيفضل آه  مكمل معانا فترة بنفس القوة....بس بعديها قوته بتقل لحد ما تضعف تماما....و تتحول قوة الإحساس ده لحاجة محفورة جواك علمتك درس قوي جدا.....حاجة بقت حتة منك ....جزء من شخصيتك....حتي مش هتفتكر إنت قبلها كنت عامل إزاي .....
يبقي مهما عديت بأيام صعبة و وحشة.....اوعي تيأس ....صدقني مش هتفتكرها....هتنساها و أما هتبص وراك كل اللي هتفتكره  هي الأيام الحلوة و الإحساس الحلو اللي سابته جواك و اللي عمرك ما هتنساه مهما عدت عليك أيام وحشة !!

عشان كدة كل ما تعدي بوحش....إخلق ذكريات حلوة بعديه...إضحك...إفرح من قلبك....فرح اللي حواليك....عشان هو ده الإحساس اللي هيفضل جواك و جواهم....الوحش مصيره يتنسي و الحلو هيعيش !

حب من طرف واحد !!

ناس كتير بتكلم عن الحب....قد أيه حلو إنك تحس إنك بتتحب.....قد أيه حلو إن حد يخاف عليك....يغير عليك....يحسسك بقيمتك في حياته....قد أيه حلو إن حد يؤمن بيك....إنك قوي و إنك تقدر تغير في الدنيا....قد أيه حلو  إنك تحس إنك أحلي حاجة حصلتله في حياته.....

لكن.....و ما أدراك ما كلمة "لكن " دي !!
للأسف مش كل الحب حلو....مش كل مرة قلبك هيتحرك فيها هتبقي هي دي المرة.....مش كل مرة هيتقالك بحبك هتبقي حابب تسمعها !!

الناس كلها أما بتكلم عن الحب بتكلم عن إنه حاجة مشتركة بين إتنين....شعور متبادل....طريق إتجاهين مش إتجاه واحد !!  بس مفيش حد بيكلم عن الطريق ده لما بيكون إتجاه واحد....عشان كدة جيت أكلم عنه النهاردة !!
الحب من طرف واحد....اوحش حاجة في الدنيا....إنك تحب حد و هو مش شايفك أصلا....أو إن حد يحبك و تبقي متأكد إنك عمرك ما هتعرف تخلي طريقكم  إتجاهين !!
الفكرة إن ناس كتير بتفتكر إن الحب من طرف واحد ده بيكون و إحنا لسة عالبر....يعني حبيت فلان و صرفت نظر عشان محبنيش أو العكس....بس الحقيقة إن فيه ناس كتير أوي بيعيشوا سنين سوا و بعدين يكتشفوا إن طرف واحد بس اللي كان بيحب التاني...طرف واحد اللي كان بيدي....اللي كان بيهتم....لما تشوفهم سوا تقول بس شكلها بتحبه أكتر.....

بس الحقيقة إن علي قد ما الحب ده بيوجع أوي الطرف الواحد اللي بيحب....علي قد ما الحب ده بيكون من أصدق أنواع الحب.....بتحب اللي قدامك حتي و هو مش حابك....مش بيديلك أي حاجة في المقابل....شايفه أحسن حد في الدنيا حتي و هو مش شايفك أساسا !!

طبعا ناس كتير أما بتتعرض للحب من طرف واحد ده بتسأل نفسها....هو لما محبش الشخص اللي بيحبني كدة أبقي بتبطر ؟؟؟ يعني ربنا هيحرمني من نعمة إني أتحب تاني بسبب إني معرفتش أحب اللي حبني ؟؟

هقولك يا سيدي...مفيش حاجة إسمها ربنا هيعاقبني عشان "معرفتش" و بالذات أما الموضوع يبقي ليه علاقة بالحب....ربنا أصلا كاتبلك مين اللي هتبقي من نصيبه في الأخر....فلو معرفتش تحب اللي حبك يبقي ولا هو مكتوبلك ولا انت مكتوبله !!

طب يعني مش حرام أكسر بخاطر اللي حبني ؟؟ طب ما أجرب؟؟ مش يمكن أعرف أحبه ؟!

هقولك علي حاجة إنك تحاول تحبب نفسك في حد ده ميبقاش أسمه حب أصلا....ده هيبقي رد فعل لحبه هو....و كدة إنت هتبقي بتظلمه اكتر من إنك تبينله إنك مش عارف تحبه من الأول !! هتكسر بخاطره بجد أما يحس إنك حبيته عشان صعبان عليك اللي بيعمله عشانك....صدقني هتبقي بتوجع قلبه أكتر !

لكن الصح...إنك لو اتعرضت لحب من طرف واحد....إنك تنسحب بهدوء....تحاول تمشي من غير ما تتسبب في وجع ﻷي حد....تحاول تمشي قبل ما تشيل ذنب الشخص اللي هيعلق حياته بيك عالفاضي....حاول تمشي و صدقني وجعه من إنك مشيت عمره ما هيكون قد وجعه إنك تفضل معاه و إنت مش عارف تحبه !! 

مراية الحب عامية

"مراية الحب عامية"
الجملة الشهيرة....."اللي بيحب حد مش بيشوف عيوبه"...الجملة اللي كننا فاهمينها غلط طول حياتنا....."مش بيشوف عيويه" طلعت كدب.....الحقيقة إنه بيشوفها و بيبقي عارفها كويس أوي....بس بعد ما عرفها لسة بيحبك.....الفكرة إن كلمة عامية هنا بتعبر عن العمي اللي بنتعمده مش اللي بيجيلنا و إحنا مش واخدين بالنا.....يعني شايفين العيوب بس متعمدين نتغاضي عنها....شايفنها بس لسة حابين اللي قدامنا علي بعضه....

طبعا الكل دلوقتي فاكرني بكلم عالحب اللي أخرته جواز....بس الحقيقة أني بكلم عن الحب عموما....حب الصحاب....الأخوات....الأهل....بنفضل نحب بعض حتي و إحنا عارفين بلاوي بعض....بنفضل شايفين إن دول احسن ناس في الدنيا الناس اللي إحنا بنحبهم.....مش عايزين حد من الدنيا غيرهم.....و إحنا زعلانين منهم بنبقي زعلانين إن فايتهم حكايات كتير عننا....بتحس إن قدرك بقي مربوط بيهم....مينفعش الحياة تمشي من غيرهم !

المهم إن المبدأ ده إحنا كتير مش بنمشي بيه في حياتنا ....كتير أوي بنبقي مركزين مع العيوب...مع الوحش بس....كأننا إكتشفناه فجأة....مع إننا عارفينه من الأول و راضيين بيه...فجأة المراية بتبقي عامية عن المميزات....مع إننا عارفين إن الناس دول بالنسبة لنا حاجة كبيرة أوي...

بس بتيجي بعد كدة و تكتشف إن الحب ده حاجة unconditional. ...مش مربوطة بشروط....بتكتشف إن مهما فترة التركيز مع العيوب طولت هتفضل تحب الناس دي......و يمكن تحس بقيمتهم أكتر....هتحس إن العيوب اللي مش بأيديهم يغيروها هي سبب في تركيبتهم....تركيبتهم المختلفة اللي خليتك تحبهم و تتعلق بيهم أكتر.....و العيوب اللي بأيديهم يغيروها هي يمكن سبب وجودك في حياتهم.....إنك تبقي جهاز الإنذار بتاعهم....إنك تساعدهم يظبطوا حياتهم أما تبوظ.....إنك تساعدهم يبقوا أحسن مش عشانك...عشان نفسهم ....ﻷن إنت كدة كدة بتحبهم علي بعضهم !!

Trust the journey

Maybe we lose parts of ourselves along the way....we may no longer become familiar with our new selves.....
maybe we feel so stressed trying to get our old selves back....we may no longer keep track with why we're going that way....
maybe we lose faith in our self understanding ....we may no longer know what we're waiting for to bring us back to happiness.....
But maybe the moral of losing is recreating. ...recreating new selves....new hearts...and  new souls.....if we were meant to stay the same way ,we would have never lost parts of us along the way....if the journey wouldn't need new versions of us , we wouldn't have been recreated...
That's why we should learn to trust the journey even when we can't understand it !!

أيهما أقوي : جسدي أم نفسي ؟!!

بقالي فترة بفكر في سؤال واحد ناس كتير ممكن تكون مشاركاني فيه و بتسأله لنفسها..."هو التعب النفسي أقوي ولا التعب الجسدي؟"....
زمان أما كنت بسأل نفسي السؤال ده كان أول إجابة بتيجي في بالي التعب الجسدي طبعا....بس بعد  خبرة كبيرة مع التعب النفسي استقريت إن التعب النفسي أقوي...يمكن بسبب إن مدته أطول مثلا....أو إن ملوش علاج....أو إن بيبقي صعب جدا إنك توصف حالتك أو اللي إنت حاسه....أو إن التعب النفسي ساعات بيتسبب في تعب جسدي مبتعرفش تلاقيله حل ﻷن سببه مش عضوي....أو إن مع تكرار التعب النفسي بيبقي صعب تقاومه بعد فترة....فضلت أطلع في أسباب و أقول إن أكيد عشان كل ده التعب النفسي هيكسب في القوة !

بعدها بمفيش ربنا إبتلاني بتعب جسدي ربنا وحده اللي عالم كان عامل إزاي...و فضل فترة برضه و بعدها عملية..و بعدها تعب ما بعده تعب...و بعدها أعيا و العرض شكله  مستمر شوية ....الحمد لله طبعا  و جدا كمان ....أنا بحكي بس عن التعب ده لغرض واحد.....إني أفهمكوا الحاجة اللي وصلتلها....إكتشفت إن اللي بيقارن بين التعب النفسي و الجسدي علي أساس إن التعب الجسدي بالنسبة له أقصي حاجة فيه البرد...يبقي أكيد التعب النفسي هيكسب في القوة.....و إن اللي هيقارن بين التعب النفسي و الجسدي علي أساس إن التعب النفسي بالنسبة له أقصي حاجة فيه الزهق من الروتين....يبقي أكيد التعب الجسدي هيكسب في القوة....

بس للأسف و إحنا بنقارن مش بنبقي شايفين الصورة كاملة....مش بنبقي عارفين إن فيه أقوي من اللي إحنا حاسين بيه بس إحنا منعرفوش عشان ربنا منعه عننا رحمة بينا....مش بنبقي عارفين إن سواء تعب نفسي أو جسدي فالأتنين متعبين و إن معظم الوقت واحد منهم بيؤدي للتاني....مش بنبقي عارفين يمكن عشان مجربناش الأقوي....يمكن عشان ديما بنحكم من خلال خبرتنا المحدودة و نظرتنا الضيقة....عاملين زي اللي بيجي يتفرج علي فيلم من آخره و يحكم ده حلو ولا وحش....

بس الحقيقة إنك لو عايز تحكم و يبقي حكمك صح لازم تشوف الصورة كاملة....و يمكن أما هتحاول تشوف الصورة كاملة هتكتشف إنه الصح إنك متحكمش أصلا....ﻷن الصورة عمرها ما بتكمل في عنيك مرة واحدة....هتفضل تكمل يوم ورا يوم و تجربة بعد تجربة....بس يوم ما أقدر أقولك إن الصورة خلاص كملت في عنيك و إن حكمك هيكون صح....يوم ما تبقي مؤمن 100% ب "لو علمتم الغيب ﻷخترتم الواقع".....ساعتها عمرك ما هتقول إن اللي إنت حاسه ده أصعب حاجة في الدنيا....ساعتها هتفهم إن الدنيا كلها صعبة بس الفكرة كلها إنك تؤمن إن الصعوبة اللي بتجيلك بتعدي علي filters كتيرة اوي قبل ما تيجي عشان ربنا أحن علينا من اي حد !!