تعرف ايه عن السعادة ؟؟!!

لما غيرت نظرتي للحياة لقيتني مبسوطة اني نازلة يوم الاجازة لمجرد اني هشوف صحابي و هنلعب كوتشينة ...                                       
لما غيرت نظرتي للحياة لقيتني بفرح بكلمة "وحشتيني" من صحابي و مش لازم من حبيب
لقيتني بفرح بالجو لما يبقي حلو ....بشكلي لما البس حلو....او حتي بضحك مع صحابي حتي لو كان علي افيه مش حلو ...
لما غيرت نظرتي للحياة لقيتني بشوف الحلو في النوم بدري عشان اصحي اشوف حد بحبه...
لقيتني بحب حاجات مكنتش بحبها لمجرد اني بقيت بشوفها بشكل تاني....لمجرد اني بقيت عاوزة اكون سعيدة....بخلق سعادتي بأيدي لما الاقيها مش راضية تجيلي.....بفرح بفرح الناس....بفرح بأبسط  الحاجات عشان عرفت ان السعادة مش معناها فيلا كبيرة و زوج مثالي و عربية بسواق و دولاب مليان هدوم و فلوس كتير و تعليم جبار و حياة بلا مشاكل.....السعادة ابسط من كدة بكتير...السعادة في حاجات بتحصلنا في كل يوم في حياتنا بس احنا اللي مش بنديلها الفرصة انها تسعدنا... السعادة في اكلة حلوة تاكلها مع صحابك و تدفع دم قلبك و ترجع بالمحفظة فاضية و تقعد تفكر هتملاها تاني ازاي ....السعادة في صدفة تشوف فيها حد بتحبه في يوم مليان بالضغط و الدوشة....السعادة في نكتة حلوة تفتكرها و انت مروح  فتقعد تضحك و الناس تبصلك و تقول "و ده ماله ده ؟"....السعادة في تريقة اخواتك عليك لما مامتك بتهتم بتغذيتك ايام امتحاناتك.....السعادة في كل كلمة قريتها دلوقتي و ابتسمت لمجرد انك ربطها  بزكري حلوة حصلت معاك...
مش بس كدة السعادة كمان ممكن تكون في حاجات شايفنها متعبة و تزعل.....زي امتحان طلع صعب فطلعنا كلنا نضحك و نقول "كان عندك تقدير و راح"....زي ضغط شغل جامد بس وسط الضغط بنضحك من كتر ما مش لاقيين وقت نخلص اللي ورانا....زي تجربة صعبة عديت بيها بس علمتك كتير و حياتك بقت احسن بعدها....زي حاجة ربنا اخدها منك بس اتعلمت منها انك تعافر لحد ما توصل....زي شكلك ايام الامتحانات و انت مش نايم و بتستخبي من اي حد يشوفك و اول ما حد يشوفك تقعد تضحك.... زي مادة صعبة مش فاهم فيها ولا كلمة و تجمع الدفعة كلها عشان يفهموك و في الاخر تفضل مش فاهم برضه...
زي حاجات كتيرة اوي شايفنها وحشة لكن في الحقيقة ان نظرتنا ليها هي اللي وحشة مش الحاجات نفسها ;) سعادتك كلها تتلخص في نضارتك اللي بتشوف منها الحياة....في استعدادك لايجاد السعادة في كل حاجة حواليك مهما كانت صغيرة او متفرحش اصلا.....
السعادة هي في قدرتك انك تبتسم كل يوم حتي لو اليوم محصلش فيه اي احداث مفرحة بس مجرد انك قعدت تعد نعم ربنا عليك خلاك تحس بالفرحة .....السعادة مش محتاجة انتظار....السعادة محتاجة اختيار و تنفيذ و قرار .....
غير نضارتك اللي بتشوف بيها الحياة...خد قرار انك مش هتسمح لأي حاجة تزعلك مهما كانت بتزعل....اختار انك تخلق سعادتك بأيدك ....و صدقني هتعرف معني السعادة اللي بجد :)

عاجباك حياتك

  نرجع بالزمن لورا شوية... نفسك تطلع ايه يا حبيبي؟  نفسي اطلع مهندس.... و يبدأ حلم الهندسة ميفارقش خياله...و هو اصلا ميعرفش هندسة دي بيدرسوا فيها ايه.....و لا عارف هو ينفع فيها و لا ﻷ.... بس هو لقي نفسه شاطر في الmaths فقال انا حلمي اكون مهندس....و يدخل علمي رياضة و يبتدي يلاقي الدنيا صعبة و مش عارف يمشي فيها... طب اعمل ايه؟ ؟ احول ادبي عشان اجيب مجموع؟ ؟ و لا اكمل؟ ؟ لا لأ كمل عشان انت حلمك تبقي مهندس.... و تطلع النتيجة و يبتدي الحلم يتحطم.... ليه يا رب كدة؟  دي فرقت معايا علي 1 % .... فنقول خلاص انا هشوف التنسيق هيجيبلي ايه .... و تأتي الرياح بما لا تشتهي الانفس..... و تدخل كلية عمرك ما فكرت فيها....و تبدأ رحلتك في رفضك لحياتك و كرهك ليها و انك مش شايف اي حاجة عدلة في الدنيا..... من هنا ابتدت الحكاية.... طبعا اللي يقرا كلامي و اتعرض لكدة في حياته هيحس انا اتظلمت.... انا اتفرض عليا كلية مبحبهاش عشان فرف 1% ... يا بختك انت يا عم دخلت الكلية اللي علي مزاجك.... ممكن نقف لحظة بقي... تصحيح مفاهيم.... انت كمان اخدت الكلية اللي علي مزاجك.... هتقولي طب ازاي؟  ده انا عمري ما كنت هختارها... انا كان نفسي ابقي مهندس.... هقولك دي كانت مجرد احلام.... حاجة صدقتها مع ان مفيش اي دلائل عليك بتقول انك ينفع تكون مهندس... بس اقتناعك ان ده حلمك و انك كنت هتبقي اسعد واحد في الدنيا لو دخلت الكلية دي.... و انها كانت هتبقي ال perfect  place بننسبالك.... هو اللي ولد جواك رفضك للواقع اللي انت فيه.... مع ان في الحقيقة انت هندسة دي متعرفش عنها اي حاجة... و لو كنت دخلتها كان هيبقي عندك نفس الرفض للواقع.... لازم تقتنع ان الحياة كلها packages .... في كل حاجة.... حتي البني ادمين لازم تقبلهم علي بعضهم بكل عيوبهم.... يبقي الكلية اللي انت دخلتها دي مش اوحش حاجة في الدنيا....و هندسة مش احسن حاجة في الدنيا .... لازم تعرف ان ربنا مش بيحطك في مكان مش هتلاقي نفسك فيه..... و ربنا مفرضش عليك حاجة.... انت اللي اخترت... اه والله.... احنا مخيرين.... و كل حاجة فيها اختيار احنا اللي مختارين ده و ربنا بس كاتبلنا اللي هو عارف اننا هنختاره.... اه طبعا فيه حاجات قدرية ....بس في دي بقي انت اللي مختار... بلاش تستسلم و تبقي سلبي و تقول ليه كدة و انا خلاص اشتغل اي شغلانة و خلاص مدام مدخلتش الكلية اللي بحبها.... ﻷ ... اشتغل علي نفسك ... خليك ناجح في المكان اللي انت فيه ايا كان.... عشان هيجي يوم و هتفهم انك فعلا مكنش ينفع تكون في اي مكان تاني.....
مش جاية اقولك متحلمش... و لا اتفه من احلامك.... و لا اقولك خليك مثالي.... بس اللي نفسي اوصله... لو عاوز تحلم احلم... بس قبل ما تكبر الحلم في دماغك... اتأكد انه لايق عليك... انك تنفع فييه... و بلاش تبص لكل حاجة مخدتهاش علي انها كان هيبقي فيها منتهي سعادتك.... عشان الحقيقة ان مفيش حاجة اسمها منتهي السعادة... و لا فيه حاجة هتحققلك منتهي السعادة.... انت في دنيا.... خليك واثق ان مفيش حاجة بتتفرض عليك في حياتك...اشتغل علي نفسك...و آمن انك في انسب مكان ليك.... يبقي متضيعش حياتك في رفضك للواقع ... غير نفسك انت و تقبله ;)

سنك كام

الموضوع عمره ما كان بالسن... الموضوع بالتجارب.... بس اكبر منك بيوم يعرف عنك بسنة...... طب نصدق انهي؟  ان السن بيفرق في تفكيرك و شخصيتك.... و لا ان الموضوع معتمد علي التجارب و مش السن.... الحقيقة انه خليط من الاتنين..... كل يوم بيعدي عليك  هو السبب في تجربة جديدة بتعيشها .... ناس بتقابلها.... منهم اللي يسعدك و يغير حياتك للاحسن.... و منهم اللي يوجعك و يخليك بني آدم اقوي ..... مواقف بتتعرضلها.... و بتسيب  بصمة في حياتك .... و تغيرك و تخليك بني آدم مختلف عن امبارح و اول و اول....  هي الفكرة بقي مش فكرة ان كل يوم بيعدي بيكبرك شوية....الموضوع بيعتمد علي نوع المواقف اللي بتتعرضلها في الايام دي.... و دي اللي ساعات بتخلي ناس سنها صغير بس  عارفة و فاهمة في الحياة زي حد عنده ضعف سنهم..... بس مهما كانت التجارب مؤثرة فينا... فلازم نفهم ان اليوم اللي انت عيشته ده كان سبب في انه يعرفك حاجات كتير اوي مكنتش هتعرفها لو معشتش اليوم ده .... يبقي فعلا اكبر منك بيوم يعرف عنك بسنة.... بس الفكرة بقي ان يوم عن يوم يفرق مجرد سنة في البطاقة عن سنة في الشخصية و العقل و التفكير..........
الخلاصة متبقاش سطحي و تعد سنك بعدد السنين اللي عيشتها.... ﻷ عده بقيمة المواقف اللي عيشتها و قيمة الحاجات اللي اتعلمتها.... ساعتها بس هتعرف تحسب سنك مظبوط  ;)