نور وسط الضلمة !!

بس خلينا متفقين...إن في وسط كل الزحمة و الخنقة و الإرهاق...فيه حاجات حلوة بتهون....زي تهييسك مع صحابك بعد يوم متعب و مش شايفين قدامكوا من التعب بس لسة عارفين ازاي تضحكوا.....زي حد كان واحشك بقاله كتير و تشوفه صدفة فتبتسم و تفرح إن ربنا خلاك تشوفه.....زي حاجة كنت خايف منها و شايل همها أوي فربنا يطمنك و بعدين تعدي علي خير و يهدي بالك !! أو زي دعوة حلوة حد يدعيهالك فجأة و تفضل مبتسم بسببها بقية اليوم !!
أه يومنا بيبقي فيه حاجات وحشة...و أه ساعات فيه أيام بتبقي لا تحتمل....بس خلينا متفقين....إن وسط كل يوم وحش و لا يحتمل....وسط كل حاجة صعبة و بتعافر فيها....وسط كل موقف خايف منه و بتقول يارب و انت بتعيط....فيه أمل....فيه نور....في رسايل ربنا بيبعتهالك في الشخص اللي بتقابله صدفة....في الشخص اللي بيدعيلك....في الضحكة اللي بتطلع وسط زعل كبير....بيبعتهالك عشان يقولك متقلقش...أنا مش هسيبك تقع....بيبعتهالك عشان يقولك "إن مع العسر يسرا"....مش بعد العسر...ده معاه....و هو ده اللي بيخلق جوانا القدرة إننا نتحمل....إننا نعدي....إننا مهما كننا تعبانين و شايفين الحياة ضلمة لسة بنقول يا رب أملنا فيك كبير !

نعمة "دوام الحال من المحال"

كل واحد بيبقي في حياته تواريخ معينة حصل فيها أحداث أثرت فيه....كل تاريخ من دول بنستناه من السنة  للسنة و إحنا متخيلين إن في ذكري التاريخ ده هنبقي حاسيين نفس الإحساس....هنبقي نفس الشخصيات و هتبقي حياتنا نفس الحياة....لكن مع كل سنة بتعدي بنكتشف إن التواريخ دي وقعها علينا بيبقي مختلف تماما. ..لو ذكري حزينة بنلاقي نفسنا بقينا أقوي من الأول ....و لو ذكري حلوة بنلاقي الفرحة و الحماس اللي جوانا ابتدوا يقلوا عن اليوم اللي حصل فيه الحدث ده....أما لو ذكري حلوة بس إتحولت بعد كدة لحاجة  وحشة بنلاقي نفسنا مش عايزين نفتكر التاريخ أصلا و بنحاول نعدي و نعمل ناسيين !
المهم إن مع كل ذكري من دول، و مع كل سنة بتعدي علي تاريخ كان مؤثر في حياتنا...بنكتشف إن الوقت بيغير فينا حاجات كتير....حاجات مكناش متخيلين إنها هتتغير  فينا و إحنا بنعيش اللحظات دي نفسها....مكناش متخيلين إن لما تيجي ذكري وفاة حد عزيز علينا هنبقي أقويا للدرجة دي....مكناش متخيلين إن في ذكري لتاريخ  حلو أوي في حياتنا  مش هيبقي جوانا نفس البهجة بتاعة زمان.....مكناش متخيلين إن فيه لحظات حلوة من اللي عيشناها هتتحول لذكريات وحشة بعد كدة !! مش معني كدة إننا بنتغير للأسوأ.... و لا معني كدة إننا المفروض نتجنب التفكير في الذكريات حتي لا نصطدم بالواقع ....لكن الحاجة الوحيدة اللي المفروض نتعلمها هي حقيقة  إن الوقت بيغير....بيغير في الإنسان و في مشاعره....بيغير في  قوته....بيغير حتي في الذكريات و حلاوتها أو وحاشتها...عشان تتأكد إن مفيش حاجة بتفضل علي حالها و إن ساعات دي بتبقي أكبر نعمة بالنسبة لنا..."نعمة دوام الحال من المحال"....بس للأسف إحنا اللي بننسي نفكر نفسنا إحنا كننا فين ساعة التاريخ ده  ....و بقينا فين في الذكري بتاعته !!

الخوف...و ما أدراك ما الخوف !!!

الخوف !! الخوف من تجربة جديدة...الخوف من التعلق....الخوف من الحلم....الخوف من انهيار  التوقعات....الخوف من الفشل....الخوف من عدم التأقلم علي حالة جديدة....الخوف من الوحدة.....الخوف من الوجع.....الخوف من البعد....الخوف من الموت....الخوف من بكرة....من المستقبل....من الحب...من الحنين....من حياة ملهاش قيمة و لا معني !! الخوف و ما أدراك ما الخوف !!

كلنا بلا إستثناء بنخاف....بنخاف من حاجات كتير أوي....منها حاجات مادية و منها معنوية...بس كل واحد فيه اللي بيخوفه ...المهم إننا لو إجتمعنا كلنا علي حاجة في الآخر... هتبقي حقيقة إننا بنخاف !! و إن مفيش حد كبير عالخوف !!

طب الخوف ده مصدره ايه؟؟ أو بمعني أصح إحنا بنخاف ليه؟؟؟ و ليه من الحاجات دي بالذات؟؟ لو مش كلنا مجتمعين عاللي بنخاف منه يبقي معني كدة إنها حاجات مش متفق عليها إنها بتخوق....يبقي ليه إحنا... ليه بنخاف منها....و ليه مبنخافش من الحاجات التانية اللي غيرنا ييخافوا منها....و ليه غيرنا ييخافوا منها !! أسئلة كتيير بس ليها إجابة !!

الخوف ليه مصادر كتير...إحنا يا إما بنخاف من حاجات "تشبه" حاجات حصلتلنا قبل كدة و وجعتنا...و لا أعني ب"وجعتنا" إنها حاجات عاطفية بس....لكن ممكن يكون فشل وجعك أوي و كسرك...ممكن يكون موت حد عزيز عليك خلاك تخاف من الموت بقية حياتك....ممكن حلم جميل اتعلقت بيه و لما نزلت علي مفيش حرمت تحلم.....و ممكن يكون شخص كسرك فخوفك من التعلق بأي شخص بعد كدة !!

و النوع ده من الخوف بيبقي مرهق جدا للنفس....بنتعب جدا كل أما بنحس بس إن حاجة زي اللي وجعتنا قبل كدة دي علي وشك إنها تحصل تاني !! بنخاف إننا نمشي في أي طريق ممكن يؤدي بينا لنهاية تشبه لأي نهاية وحشة من اللي عيشناهم !!

خلصنا من أول نوع....طب النوع التاني ايه؟؟ النوع التاني بيبقي خوف بدون سابق تجربة...و ده بيبقي سببه إن مفيش نتيجة معروفة بالنسبة لك للحاجة اللي انت داخل عليها....أو فيه نتايج معروفة  بس كلها  نتايج  لتجارب ناس تانية غيرك فخايف تطبقها علي نفسك لا نتيجتك انت تطلع مختلفة  !!

و ده زي الخوف من الإرتباط....الإنفصال....الدخول في شغل جديد....التعرف علي ناس جديدة....خوفنا قبل ما ندخل الجامعة....إنك تخوض تجربة هتخليك تعيش حالة جديدة مش عارف هترتاح فيها ولا ﻷ...الخوف من الموت بسبب انك مش عارف انت داخل علي ايه ....الخوف من المستقبل....من بكرة...فهو الخوف من كل ما هو جديد و مبهم و نتيجته مجهولة  بالنسبة لك ﻷنها تجربتك الأولي معاه !!

النوع ده من الخوف بيبقي في ظاهره أقوي من النوع الأول....لكن في الحقيقة هو أكتر نوع من الخوف بنقدر نتغلب عليه....ﻷنه ملوش أساس قوي...إحنا خايفين أه...بس لو دورنا جوانا شوية هنلاقي إن مفيش حاجة تؤكدلنا إن النتيجة السيئة هي اللي هتحصل...و إن فيه إحتمال 50% إن النتيجة الكويسة هي اللي تحصل....و عشان كدة في معظم الوقت ينتغلب عليه...و بنعدي !!

طب النوع التاني ؟؟ النوع المرهق ؟؟ و لا أقولك.. ما  الخوف كله مرهق للنفس...
الخوف مجرد إحساس مزيف إحنا اللي بنخلقه جوانا أو بنسمح للظروف إنها تسيبه يتولد جوانا....و يا بيفضل عايش معانا طول العمر....يا بنعرف نتغلب عليه مهما كانت قوته !! الخوف عامل زي الشيطان...بيفضل يزن عليك لحد أما يشوفك بتتأذي....بس زي ما بأيدينا نسكت زن الشيطان....بأيدينا نسكت زن الخوف....ﻷنك  لو مسكتش الزن بتاعه...هيعرف إزاي يؤذيك !!