فن التعبير عن المشاعر !!

طبعا أول ما شفتوا كلمة "مشاعر" يبقي علي طول هكلم عن الحب.....لا ﻷ خالص....مش ده اللي جاية أتكلم عنه النهاردة.....أنا جاية أتكلم عن فن التواصل عامة....التعبير عن المشاعر....فالمشاعر مش  بالضرورة الحب بين  رجل و امرأة .....إحنا بس اللي مش بنستخدم الكلمة دي غير في الحالة دي و بس....لكن هي في الحقيقة كلمة أوسع بكتير....كلمة تشمل مشاعرنا من غضب...لخوف....لإحتياج....لحب بين أصدقاء....لحب أخوي....لحب أبوك و أمك....تشمل مشاعرك في بداية كل حاجة....رهبة...انبهار....أو حتي مشاعر ملخبطة مش عارف تصنفها تحت حاجة معينة.....كل ده مشاعر كلنا بنحسها ...بس مش ده المهم ....السؤال بقي....بتعبر عن مشاعرك أزاي ؟؟

فيه اللي بيعبر بكلام....و فيه اللي بيعبر بمواقف....و فيه اللي بيعبر بالأتنين.....فلو خدنا مثال اتنين صحاب واحشين بعض....هنتخيل موقف كل نوع من ال3 أنواع:
اللي بيعبر بالكلام: "وحشتيني جدا بجد مش متخيلة قد ايه بجد"
اللي بيعبر بالمواقف: "ألو أنا تحت البيت انزليلي يلا عشان نخرج شوية"
اللي بيعبر بالأتنين: "ألو أنا تحت بيتك و قلت أعدي عليكي ننزل شوية عشان وحشتيني جدا و مش هينفعني كلام في تليفون"

تلات نوعيات اختلفوا في طريقة التعبير عن المشاعر....و لكن اتفقوا في حاجة واحدة و هي "حقيقة" المشاعر نفسها.....يعني من الأخر التلاتة عرفوا يوصلوا مشاعرهم بس مش ده اللي ليه كل الأهمية....الأهم هي صدق المشاعر.....الشطارة مش في مين بيعرف يعبر أكتر....الشطارة...و لا استنوا احنا حتي مش هنسميها شطارة...هي أصلها مش مسابقة.....المهم إنك تبقي صادق في مشاعرك قبل ما تفكر أنك تعبر....و علي قد صدقك علي قد ما اللي قدامك هيصدق اللي هتعمله مهما كان مش مبين قوة مشاعرك و كان موقف صغير علي انه يبين  اللي جواك....
بس للأسف أكتر نوع بيتظلم هو النوع اللي بيعبر بالمواقف ده.....ﻷن للأسف معظم الناس بتحب تسمع كلام مهما كانت بتشوف مواقف تثبت الكلام من غير مايتقال....بس بتحب ديما ييقي فيه زيادة تأكيد....عشان يطمنوا و يصدقوا أكتر... و ده اللي بيخلي اللي بيعرف يكلم و يقول كلام حلو ديما "بيقش"......و اللي ملوش في الكلام ديما مشاعره هو بس اللي يعرف مدي قوتها ﻷن المواقف لوحدها مش بتوصل....
بس أنا مش جاية النهاردة اقول النوع ده وحش و خليكوا في النوع ده.....و لا انصح اللي مبيعرفش يقول جوانيات يتعلم يقول.....أنا جاية أقول انه مش عيب ان يبقالك طريقتك الخاصة في التعبير عن مشاعرك....مش عيب ان ميبقالكش في الكلام المتزوق.....المهم انك تلاقي طريقة تعبر بيها....و الأهم ان الطريقة دي تبقي بتعبر عنك انت ....بتاعتك و مش مصطنعها.....أما باقي السكة فهتبقي علي اللي قدامك....انه يفهمك.....يقدر ان دي شخصيتك.....و يحب ده فيك و ميعتبروش عيب.....ﻷن مش مهم الكلام المتزوق......المهم احنا جوانا ايه.!!

Be thankful

You should be more thankful to the moments when you were hurt....you cried badly on your bed at night....or even when you were broken..than to any other moment that touched your heart in a good way.......those who value these  moments of broken promises....hurting words....or even disappointments....actually have the potential to be the strongest people ever.....those who can perceive a bad moment as a sign from allah  to start changing to the better.....to stop being weak or even stop being too sensitive to life incidents and people's mistakes and actions....can actually live their life peacefully more than they ever did......
those moments of facing the ugly truth of life that you can actually get  hurt....deceived or disappointed. ....that you can live a lot of bad moments because life is just imperfect. .....or that you will  never feel that permenant feeling of being happy or over the moon....those moments are the moments of enlightenment. ......moments of feeling "finally I've come to know this"....and not just knowing it but believing in it and living completely satisfied with the  imperfections  of life and people.....it's the moment when you discover that you've not  lived your life untill you were trully hurt.....it's the moment when you understand the moral behind every difficult situation you've come through.....those who were hurt are definitely more blessed than those who were not.....and that's why they should be thankful ! Thankful till the end of their life !!

مش عايزة أتجوز

من فترة كنت بتفرج علي مسلسل "ذات"....فكان فيه مشهد و هما بياخدوا رأي ذات في العريس اللي متقدم لها "باسم سمرة"....ف مامة ذات و هي بتحاول تقنع أبوها قلتله "أنت عايز بنتك تقعد جنبك كدة و هي داخلة علي ال21 من غير جواز....عايزها تعنس؟؟" ده given إن صحابها كلهم كانوا اتجوزوا و هي اللي فاضلة فيهم....
المشهد ده طبعا أما شفته وقعت عالأرض من الضحك....بس الحقيقة إن بقالي فترة عمالة أكتشف إننا بنرجع بالزمن لورا تاني....و إن الجواز أو الخطوبة في السن ده رجعوا عادي تاني....مش معترضة علي ده والله و ربنا يكرمهم و يفرح قلوبهم كلهم....بس أنا هتكلم عن نفسي....بحس إني فيه حاجات كتير أوي في حياتي نفسي أحققها قبل الإرتباط و المسؤلية. ....أه عمالين نقول كبرنا كبرنا....و أه الواحد بيعدي بحاجات في حياته مخلياه عايش سن أكبر من سنه....بس في نفس الوقت بحس إني لسة عايزة أحقق ذاتي ....عايزة أحلم و أحقق حلمي....عايزة أنجح....عايزة يبقي ليا مستقبل و career.....عايزة اخرج و اتبسط و اتفسح و أعيش سني.... ببساطة عايزة أعيش كل مرحلة بمرحلتها.....مش عايزة أحس في لحظة أني ندمانة أني ضيعت فترة معينة من شبابي من غير ما أحقق اللي كان  نفسي فيه.....
الخلاصة. ..نصيحة لكل بنت....لو فيه حد فعلا بيحبك و بتحبيه يبقي خلوه حب حلال علي طول عن طريق خطوبة أو جواز.....لكن غير كدة  متحسيش أنك مستعجلة و إن فيه حد بيجري وراكي لمجرد إن كذا واحدة تعرفيها اتخطبت أو اتجوزت....أنتي لسة في عز شبابك...و قدامك حاجات كتير أوي تحققيها.....مفيش حاجة أسمها عانس....كل حاجة بتيجي في وقتها...يبقي شيلوا الموضوع من دماغكوا شوية....مش هو ده بس الهدف اللي انتوا عايشين عشانه !!

الخوف من التعلق !!

بنتعلق بمكان.....بشخص....بفترة زمنية في حياتنا....بحاجة عزيزة علينا...بلحظة مش عايزنها تعدي....أو حتي بإحساس كننا بنحسه وسط ناس معينة....المهم إننا بنتعلق....بنتعلق بمزاجنا أو مش بمزاجنا. ....بنتعلق و يتولد جوانا حاجة عاملة زي الshortcut كدة للمكان أو الشخص أو أيا كان اللي اتعلقنا بيه.....و يفضل جوانا الshortcut ده لغاية أما الmemory تتملي فنضطر نمسح حاجات قديمة عشان نفضي مكان لحاجات جديدة.....

طب هو التعلق ده بيتولد بسبب ايه؟

أي حاجة في الدنيا ممكن تتعلق بيها لو أتعودت عليها  في حياتك لفترة كبيرة......أو حتي فترة قصيرة بس مؤثرة جدا......فكرة التعود عامة علي حاجة أو شخص أو مكان أو حتي إحساس بيولد جوانا التعلق.....
 
طب هل التعود ده إرادي ؟؟
التعود ده عامل زي النوم....عمرك أفتكرت أما صحيت من النوم اللحظة اللي رحت فيها في النوم؟؟ طب عمرك عرفت تقاوم النوم و انت تعبان و عنيك بتقفل؟؟

التعود ده  إحساس لا إرادي.....بنحس بيه و إحنا مش عارفين إحنا ابتدينا نحس بيه أمتي...فبالتالي مبنعرفش نبقي مجهزين نفسنا عشان نقاومه قبل ما يبدأ  ﻷننا مش عارفين  هو هيبدأ أمتي.....و مبنكتشفش إننا اتعودنا غير بعد ما نتعود *أي بعد أستيقاظنا من النوم*.....

زي ما قلت قبل كدة إن مع الوقت و لما الmemory بتتملي بنحتاج نمسح حاجات قديمة....و ده لو شبهناه بموقفنا مع الإستيقاظ فكأننا صحينا غصب عننا ﻷننا ورانا حاجات.....فبنتخلي عن تعلقنا ده عشان اتعلقنا بحاجات جديدة نسيتنا القديم....
بس أنا جاية النهاردة أركز أكتر علي حاجة تانية...و في نظري هي حاجة أهم.....و هي الخوف من التعلق....أو بتشبيهنا "الخوف من الإستيقاظ"

طب هي الناس بتخاف تصحي ليه؟؟؟ يا إما هربانين من مواجهة الواقع عشان فيه حاجات بتوجعهم....أو هربانين من مواجهة نفسهم عشان لو واجهوها هيحسوا بضعفها.....أو حاسيين إن في خيالهم عالم أجمل بكتير من واقعهم فبيهربوا ليه و بيكرهوا أي حد يفوقهم من عالمهم ده....

نفس الحكاية مع التعلق....بنخاف نتعلق عشان ببساطة خايفين من إحساسنا لما نتعلق....إحساس التمسك بحاجة أوي ده عشان لفترة طويلة كانت مصدر سعادتنا....خايفين من مواجهة نفسنا لو في يوم الحياة أجبرتنا إننا نبعد عنها......فعايشين في عالمنا الخاص بينا....عاملين جوانا سور مش سامحين لحد إنه يعديه....و بنكره إي حد يحاول يخرجنا من عالمنا ده...

المشكلة للأسف إننا ساعات بنﻻقي نفسنا غصب عننا سمحنا لحد يعدي السور و اتعلقنا من جديد....فبنبدأ نكره نفسنا إننا إحنا اللي بنخرج نفسنا من هذا العالم الذي يتميز براحة البال.....عالم بالنسبة لنا هو our comfort zone. ....ﻷنه ببساطة بيبعدنا عن كل ما هو متعب في هذه الحياة و هو "التعلق"...

بس مش ده الحل....عمر الخوف ما كان الحل...الخوف طول عمره بيقتل جوانا الإحساس  بأي حاجة حلوة.....يعني خوفنا من التعلق هيمنعنا من الإحساس بحلاوة التعلق بشيء و جعله مصدر سعادة لينا.....
و في نفس الوقت التعلق أوي ده برضه مش حلو....

فخلينا فاكرين  إنه مش عيب إننا نتعلق أهم حاجة إننا منسمحش  للتعلق بأي حاجة إنه يتملكنا....أو يسيطر علينا.....خلينا كل ما نعمل shortcut جديد نمسح القديم....و خلينا نستمتع بحلاوة كل لحظة....مهما كننا خايفين من اللي بعدها....الحياة لازم تستمر....

رأيت الله !! "دعوة للتفكر"

كنت قاعدة بليل باصة للسما....و فجأة الكهربا قطعت *أو مش فجأة يعني هي بتقطع علي طول إحنا بنتفاجأ لما تيجي أصلا D: *....ما علينا المهم فقلت هجرب أعمل حاجة....فتحت الكاميرا في الموبايل و فتحت الفلاش و قلت هجرب أصور السما....و أشوف هل الصورة هتطلع زي ما أنا شايفة و لا ﻷ....المهم بصيت للصورة لقيت إن مفيش أي حاجة باينة....و القمر باين بالعافية....بصيت للسما لقيتني شايفة كل حاجة....ولقيتني شايفة حاجات بضوء القمر كمان *مع العلم إن مفيش أي اضاءة تانية غيره*.....

طب أيه....فهمتوا أنا عايزة أوصل ﻷيه؟؟
الصورة اللي صورتها بالموبايل *اللي من صنع الإنسان*....ملقتطش أي حاجة من الحقيقة....أما العين *اللي من صنع ربنا* شافت كل حاجة حتي لو كانت صغيرة....حسيت ساعتها بمعني "أفلا تتفكرون"....

فكرة التفكر في كل حاجة ربنا خلقهالنا....من أصغر مخلوق ﻷكبر و أقوي مخلوق....في قدرتك علي الرؤية و قراءة الحروف و الأرقام....عنيك بتفرق بين الحرف و الرقم و الرسمة....بتعرف تفرق بين الألوان....و مخك يوصل أشارات للسانك إنه ينطق بأللي شايفه....

في قدرتك علي السمع و التفرقة بين الأصوات....و إزاي الأعمي بيبقي حاسة السمع عنده قوية كتعويض ليه......
في قدرتك علي الحركة....بتتولد مبتعرفش تعمل أي حاجة. ....و مع الأيام بتتعلم إزاي تتحرك.....من إنسان بيتشال....ﻹنسان ممكن يدخل بطولات عالمية في الرياضة....
الموضوع مش في الحواس اللي إحنا شايفنها و بس....ﻷ انت لو تعمقت جواك هتلاقي عالم تاني.... قد أيه فيه  دقة في جهازك الهضمي و المناعي و التنفسي ....كل عضو عارف وظيفته....كل حاجة في مكانها....مفيش حاجة بتدخل علي التانية....
مش بس حواسك.....الشمس و القمر....كل واحد عارف بيطلع أمتي....عارف وظيفته...و الأهم عارف حدوده.....عمره ما يطلع برا مجراه....

مش كدة و بس....أنت عندك قدرتك علي النوم...الصحة...الستر....الرزق....القدرة علي الإستمتاع....الأمل بعد اليأس...القدرة علي التعلم...الحب...الكره....النسيان....التذكر...
التفكير...و حاجات تانية كتير لا تعد و لا تحصي....

كل ده و إحنا في عالم البشر  و بس....ما بالك  بقية المخلوقات ؟؟ *و ما خفي كان أعظم*
السؤال بقي....مين المتحكم في كل ده؟؟ مين اللي بأيديه ملكوت السما و الأرض.....مين يقدر علي أي حاجة بمجرد أنه يؤمرها *كوني فتكون*......
مش لازم نكون شايفين ربنا قدامنا....ممكن نشوفه من خلال كل حاجة خلقها....في قدرته علي تحويل العدم للوجود....في عظمته....في الحياة....في الموت....في نفس خارج و نفس داخل....
ربنا بيتشاف في كل حاجة في حياتنا....في كل لحظة بتعدي علينا فنحس بأننا بنقرب أكتر.....في كل بلاء بنعدي بيه و نحس بوجود ربنا جمبنا فيه....و في كل نعمة بتجيلنا من حيث لا ندري.....
فهي دعوة للتفكر....دعوة للتفكر في كل ما خلق الله....لنستشعر وجود الله بداخلنا.... لنري الله في خلقه....قبل أن نراه يوم القيامة.........فلنتفكر !!!