معلش....اصل مفيش نصيب !!

****** "got engaged"
******became "single"

-ايه ده بجد؟؟
-احسن والله مكنش يستاهلك
-معلش حبيبتي ربنا يعوضك
-ياعم مفيش احلي من العذوبية

هو ايه الحكاية ؟؟ هو احنا بنلعب ولا ايه؟؟ يوم مخطوبين و يوم فسختوا الخطوبة؟؟ هو اللي بينكوا  حاجة سطحية اوي كدة لدرجة انه ينتهي في لحظة ؟؟ هو مكنش فيه حاجة بينكوا تستاهل انك تتمسك بيها؟؟ هو انت دريان انت بتعمل ايه؟؟ طب انتي دريانة؟؟ طب بلاش دريانة....حاسة انك قد قرارك؟؟
- ثانية كدة تقصد انهي قرار؟؟ اننا نتخطب من الأول ولا اننا نسيب بعض ؟؟
-اعتقد ان الإجابة مش هتفرق كتير !!

نرجع لورا بقي شوية....هي دي الحكاية اللي ابتدت بإعجاب....شافها...اعجب بيها....حس انه بدأ يتشد ناحيتها و بقي يحبها......فراح يخطبها من اهلها ؟؟

ولا استني كدة....مش دي الحكاية اللي كانت اولها صحوبية و بعدين أما خلص جامعة راح خطبها؟؟

ولا تكون دي الحكاية اللي خليتهم يتخطبوا و هو لسة مش جاهز و يقعدوا مخطوبين سنين لحد أما يجهز ؟؟

ولا دي حكاية اول عريس جه جاهز من مجميعه ففرحنا بيه و قلنا دي فرصة متتعوضش ؟؟

ولا دي حكاية الخطوبة اللي اتفسخت لما الأهل ابتدوا يكلموا في الجد ؟؟

و لا ده الشاب اللي عاوز يجوز و خلاص فبيروح يخطب قبل أما يعرف دي مين ولا حكايتها ايه و بعدين يحس انها مش مناسبة ؟؟

ولا دي بقي حكاية البنت اللي حست ان قطر الجواز فاتها فإتخطبت عشان تخلص من زن الناس ؟؟

ولا ده اللي خطب و هو لسة في الجامعة و بعدين سابوا بعض بسبب انهم لسة مش ناضجين كفاية ؟؟ 
ولا دي حكاية مين فيهم .....؟

الموضوع مش في الحكاية ابتدت ازاي....ولا ليه...ﻷنها سواء ابتدت بحب أو مصلحة أو رغبة في الجواز أو غيره...فهي في كل الأحوال النهاية واحدة....ان الخطوبة بتتفسخ....طب ليه؟؟؟ مين السبب ؟؟ أو بلاش مين؟؟ ايه السبب ؟؟ زهق ؟؟ وجع ؟؟ شك ؟؟ حب من طرف واحد ؟؟ أو مفيش حب أصلا؟؟

طب خناق كتير ؟؟ غيرة ؟؟ حس انه لسة في عز شبابه و انه اتخنق بدري؟؟ ولا شاف حد أحسن؟؟

طب انتي...عرفتي تسكتي زن الناس بس معرفتيش تسكتي الدوشة اللي جواكي؟؟ ولا انت مليت خانة خاطب بس مش حاسس ان هي دي اللي تنفعك ؟؟

مهما اتعددت الأسباب ديما بيبقي عندنا اجابة واحدة للتعليق علي الموقف ده ...."معلش....اصله مفيش نصيب"....بتبقي الجملة اللي بتهون حتي لو كان جوانا غضب شديد و مش فاهمين طب لو كانت النهاية هتبقي كدة...ابتدينا ليه من الأول؟؟ بس اللي بيسكت غضبنا ده هو إيماننا إن أي حاجة من عند ربنا خير....فبنقول معلش.....اكيد فيه حكمة !!

بس الموضوع مش في تقبلنا لده أو ﻷ....ولا في الوجع اللي بيتسبب فيه ده.....لكن في ال *ليه* اللي مش هدفها اعتراض علي حكمة ربنا....لكن محاولة منا لفهم ليه الموضوع ده انتشر اوي كدة؟؟ ليه العلاقات مبقتش بتكمل كتير؟؟
يمكن لو دورنا هنلاقي ان فيه حاجة واحدة اللي ممكن الكل يجمع عليها....ان احنا مبقناش نتحمل اي حاجة من بعض .....او بمعني اصح اللي بيربطنا بقي اضعف بكتير من انه يخلينا نعدي اي حاجة صعبة تحصل بينا و تهدد تكملة العلاقة دي !!

اللي يقولك زمانكوا زمن منيل....قوله والله عندك حق....ﻷن زمان كان اللي بيربطهم حاجة قوية جدا  ....كانوا بيقدروا يعدوا بيها اي حاجة.....لدرجة خليتهم يكملوا 30 و 40 سنة جواز بكل المشاكل و الخناق اللي بينهم و قدروا يعدوا....
لكن دلوقتي مع اول مشكلة كبيرة بنقول شكرا مع السلامة....بقت اسهل كلمة خلاص احنا مش هينفع نكمل مع بعض ! بقينا بنلجأ للحل السهل و هو الإستسلام.....الإستسلام للسلبية و اللامبالاة اللي بتبقي جوانا تجاه الشخص ده وقت الزعل.....و بنحس انه عادي اننا نكمل من غيرهم...كله بقي عادي....اكتر حاجات مينفعش تبقي عادي بقت عادي....مبقناش بنتمسك و لو للحظة....بقينا مستبيعين.....مش مستعدين نبذل اي مجهود في اننا نتمسك باللي قدامنا....ﻷنه ببساطة مفيش حاجة قوية جوانا تزقنا اننا نعمل ده !!

الخلاصة قبل ما تفكروا تتخطبوا ....فكروا ان دي هتبقي مسئولية....و مسئولية كبيرة كمان ...و ان قبل ما تربطوا نفسكوا بدبلة في اليمين ....فكروا ازاي تخلوا الدبلة دي تربطكوا بروابط قوية....تخليكوا تتمسكوا ببعض مهما حصل و تعدوا مع بعض اي حاجة مهما كانت صعبة !!
فلنتفكر !!