مش هنجح....مش هجرب....مستاهلش....مش هتحب....مش هيتغفرلي..أنا فاشل.....أنا وحش.....أنا عمري ما هتغير...أنا هفضل كدة مش فالح في حاجة....يعني هما هيسيبوا الناس كلها و يقبلوني؟؟...أصل أنا واقعي و عارف إمكانياتي....مستحيل أحقق حلمي....مش هكون....مش.......
كام مرة قلت كدة عن نفسك....كام مرة حسيت إنك بتحكم علي نفسك بدون أي أدلة....أو بدون أي وجه حق إنك تحكم عليها....كام مرة واجهتك مشكلة و حسيت بعدها إن حياتك كلها وحشة....كام مرة قلت جملة "أنا مش طايق نفسي".....كام مرة حسيت إنك كاره نفسك....كام مرة تصرفات ناس كانت سبب إنك تفقد ثقتك في نفسك.....كام مرة حسيت إن معندكش أي حاجة مميزة و إن الناس كلها أحسن منك....كام مرة كنت بتكلم حد من صحابك و عمال تقوله "خلي عندك ثقة في نفسك أنت تقدر" و بعدين حسيت إنك محتاج تقول لنفسك الكلام ده....
أقولك أنا كام مرة ؟؟ و لا انت عارف.....
زي ما يكون في طار بيننا و بين نفسنا....زي ما نكون بنكره نفسنا بجد....عمالين نحبط فيها....نحكم عليها....مع إننا مش بأيدينا إننا نحكم....و لا حتي نعرف نحكم....بنقول أي كلام....مفيش اي دليل يثبت إنه صح....بس مستمرين....و أي حد يوقفنا يبقي هو اللي بيجاملنا....لكن أكيد فكرتنا السيئة عن نفسنا هي اللي صح....
المشكلة إننا مش شايفين إننا نستاهل أي حاجة كويسة....ديما جايين علي نفسنا....و بنسمح للناس يجوا علينا....ﻷننا مش مقدرين قيمة نفسنا....أو بمعني أصح مش عارفين قيمتها من أصله....
الموضوع مش مقتصر علي كدة و بس....إحنا للاسف ساعات أما بنتخنق و نزعل و ونقعد بالأيام مش عايزين نكلم حد إحنا كدة بنكره نفسنا...و أشد الكره كمان....ﻷن اللي بيحب حد مبيسيبوش زعلان كل ده من غير ما يطلعه من اللي هو فيه....
بس للأسف طول ما إحنا مش حابيين نفسنا مش هنعرف نفرحها....مش هنعرف نرتقي بيها....محدش بيعرف يفرح حد هو مبيحبوش.....و محدش بيشجع حد إنه ينجح و هو مش طايقه....للأسف هو ده اللي بنعمله مع نفسنا و إحنا مش حاسيين....مش عارفين نحبها....
لو حبيت نفسك هتعرف تفرحها....هتعرف تجيبلها هدية عشان تكافئها....هتعرف تخرجها وقت ما تزهق....هتعرف تخفف عنها وقت الشدة....هتعرف تسامحها أما تغلط....هتعرف تديها فرصة تانية....هتعرف قيمتها و إن محدش ينفع يجي عليها و لا حتي أنت....
لو حبيت نفسك هتعرف إزاي تعيشها عيشة حلوة....لو حبيت نفسك هي كمان هتحبك و مش هتخليك تعمل حاجة وحشة....
حب نفسك عشان نفسك....حب نفسك عشان حياتك هتبقي أحلي كتير أما تحبها...حب نفسك عشان ببساطة هي تستاهل انها تتحب :)
