فيه مشاهد كدة تحس إن القدر بيتبلور فيها جدا.....أكثرهم مشاهد الفراق....فراق بسبب موت أو ظروف تانية مش ده الموضوع....المهم إنك لو رجعت الشريط قبل مشهد الفراق ده بكام يوم هتلاقي نفسك كنت في عالم تاني.....مكنتش عارف إن ده المشهد اللي جي....كأنك كنت قاعد بتتفرج علي فيلم و مش عارف النهاية هيبقي شكلها أيه....المشاهد اللي هي بتيجي في الفيلم فجأة و مبتبقاش متوقعها....الأحداث اللي بتشقلب القصة عالأخر....اللي كنت قبلها ماشي مع رتم الفيلم عادي و مش عارف إن القصة هتتشقلب كدة في المشهد اللي جاي....المشاهد دي في حياتنا بعتبرها مشاهد الإنذار....ممكن تخضك....تخليك تعيط....تتعب....تكتئب....تحس إن حياتك باظت عالأخر....بس الفكرة إن الهدف منها إنك تتأمل اللي قبلها ....و تكتشف إنك مهما حاولت تغير في الأحداث اللي قبل المشهد ده....مش هتعرف تغير المشهد....هتوصله برضه مهما حاولت.....الدعوات اللي كنت بتدعيها عشان ربنا ميبعدكش عن أشخاص معينة و تلاقيهم بعدوا .....محاولات الدكاترة عشان ينقذوا الشخص اللي كان بيموت و تلاقيه مات .....الإتفاقات اللي قبل الجواز اللي بتبقي كلها ماشية تمام و تبوظ علي صالون ولا سفرة.....كل ده بيحصل مش عشان تقف و تتنح عند المشهد ده.....لكن عشان تعرف إن ده قدرك....و إن القدر مهما حاولت مش هتعرف تغيره.....مش عشان تبقي مجبور إنك تعيش حاجة مش حاببها أو شايفها شر بالنسبة لك.....لكن عشان تعرف إن القدر ديما فيه الخير ليك....و إن محاولاتك ﻹبعاده دي بتفشل عشان وصولك للمشهد ده هو الخير ليك....مهما كان في ظاهره شر....هيجي اليوم اللي هتفهم الحكمة من ورا القدر ده ....حتي لو كان اليوم ده يوم القيامة أما تلاقي جزاء تقبلك و رضاك بقدرك جبل من حسنات تدخلك الجنة....عشان كدة إصبر علي قدرك مهما كان قاسي في مظهره....صدقني هيجي اليوم اللي تفهم فيه كل حاجة و تحمد ربنا علي كل لحظة اتوجعت فيها !!
No comments:
Post a Comment