مخنوووق

-مالك؟
-مفيش مخنوق

~طب و إنت شكلك فيك حاجة ؟
~مفيش شوية مشاكل و هتروح لحالها

○ إنت كويس ؟؟
○لا يا عم مش كويس بس أهوه الحمد لله.

هي أيه الحكاية ؟؟ الفترة دي مالها ؟؟ ليه كل أما تقابل حد يا إما تحسه مهموم يا تعبان يا فيه حاجة خنقاه و ساكت.....أيه اللي حصل ؟؟ طب إحنا متفقين نتخنق سوا او حاجة ؟؟ ماهو أصل فيه حاجة مش طبيعية..... و لا أيه ؟؟

طب هو مبدأيا كدة تصحيح مفاهيم بس.... إنك تلاقي كذا حد تعبان في الدنيا دي حاجة طبيعية و ظاهرة عادية جدا.....يمكن اللي محسسنا إنها مش طبيعية بس هو إن كله تعبان في وقت واحد....بس في الأخر هي دنيا....لو كنت مرتاح فيها يبقي فيه حاجة غلط !! الدنيا مش مكان للراحة....إحنا مجرد بنعافر فيها عشان نخلي حياتنا "شبه" كويسة لحد ما نمشي منها علي خير !

طب أيه اللي خانق الناس ؟؟ هل هي حاجة واحدة ؟؟ ولا كل واحد عنده اللي يخنقه و زيادة ؟
الحقيقة إن المناخ العام يدعو أي حد متفائل إنه يكتئب....البلد بقت تقرف بكل حاجة فيها...
طب أكيد مش كلنا مخنوقين بسبب البلد!
أه أكيد طبعا....كل واحد عنده مشاكله و حياته اللي ساعات بتبوظ لدرجة إنه بيحس إنها مش هتتعدل تاني أبدا.....ممكن تكون إبتلاءات كتيرة ورا بعض فالواحد بقي متنح....مش عارف يتحرك و يلحق نفسه ....سايب نفسه كدة للدنيا تبهدل فيه براحتها و هو مش معترض....ﻷنه مبقاش عنده طاقة حتي إنه يعترض !!
بس علي الرغم من إن ساعات الإبتلاءات بتطول و بتقضي علي طاقة البني آدم خالص في إنه يقاومها....إلا إن فيه جملة أنا مؤمنة بيها جدا
"Allah gives his hardest battles to his strongest soldiers "

الفكرة بس في إننا ندرك إننا نمتلك القوة دي....القوة اللي بتخلي ربنا يقدرلنا إننا نقع كتير لحد ما نعرف إزاي نقوم.....القوة اللي مهما حد قالك إنها جواك مش هتصدقه....بس صدقني جرب تصدقه و هيجي اليوم اللي مش هتندم فيه إنك صدقته....اليوم اللي هتلاقي نفسك قمت من تاني بعد ما كنت فاكر إنك خلاص بقيت نصف ميت !!