الحجاب...طرحة أم سلوك ؟

من فترة كبيرة جدا تقريبا في بداية حجابي من 3 سنين....حصل معايا موقف بيحصل مع كل البنات و يمكن كل يوم كمان و الموقف كان إني "إتعاكست"
عادي ناس كتير ممكن تشوف إيه المشكلة في كدة؟؟ ما ده بيحصل معانا كل يوم.....ايه يعني إتعاكستي ما فيه منقبات و بيتعاكسوا.....طب ايه الجديد يعني؟؟

الفكرة إنك أما بتبتدي تبص للغلط علي إنه مبقاش غلط لمجرد تكراره ده يبقي أكبر غلط....مش معني إن المعاكسات بتتكرر يبقي ده صح....و مش معني إن المعاكسة من طرف الراجل يبقي البنت بيسقط عنها الغلط....
طبعا أنا دلوقتي سامعة ناس كتير مش طايقاني....و أزاي يعني البنت غلطانة....هو اللي مترباش !!

طب بالراحة كدة....هنتكلم بالمنطق...زي ما أي دستور في العالم بيقول إن أي مواطن ليه حقوق و عليه واجبات....يبقي مينفعش أما يحصل غلط أقول الغلط كان متعلق بجزء "الحقوق" بس و اتغاضي عن جزء "الواجبات".....يعني من الأخر زي ما ربنا أمر الرجالة إنهم يغضوا البصر....أمر الستات إنهم يلتزموا بالحجاب....و الحجاب اللي ربنا أمرنا بيه مش بمفهوم الحجاب المنتشر دلوقتي "طرحة" و أفضل ألبس نفس لبسي قبل الحجاب....الحجاب هو ما لا يصف و لا يشف ! يعني ال leggings مش حجاب....الshefon اللي مش تحتيه بطانة مش حجاب.....الturbon مش حجاب !!

مش جاية أعقد الناس ولا أقولهم كل حاجة بنعملها حرام !! ﻷ خالص....بس الفكرة كلها في "التذكرة"....
《ذكر فإن الذكري تنفع المؤمنين》

المشكلة إننا كبنات مش بنحاسب بس علي الرجالة اللي بنفتنهم بلبسنا الملفت...بنحاسب كمان عن البنات اللي زينا اللي بنفتنهم برضه....هتقولي منين هما بنات و منين بنفتنهم؟؟ هقولك ﻷن أما بنت تبقي بتحاول تلبس لبس ملتزم و تشوف كل اللي حواليها مش لابسين كدة هتبدأ تتفتن....و تبدأ تدخل في دوامة  《و إن تطع أكثر من في الأرض يضلوك عن سيبل الله》

الموضوع مش موضوع لبس بس.....الموضوع موضوع سلوك....محجبات كتير دلوقتي سلوكهم لا يتناسب خالص مع كونهم محجبات.....اللي بتشرب سجاير و اللي بتشرب شيشة و اللي علاقتها بالولاد منفتحة زيادة عن اللزوم....طب هل ده ينفع ؟؟ هل حجاب "الطرحة" اللي في مجتمعنا دلوقتي هو ده اللي ربنا أمرنا بيه؟؟ هل يوم القيامة هنحاسب إننا كنا محجبات كدة؟؟ هل ينفع ربنا يؤمرنا نصلي الظهر 4 ركعات فإحنا نصليه 2 ؟؟ الفكرة وصلت؟

الفكرة التانية اللي عايزة أوصلها هي "تصحيح مفاهيم".....مش معني إن البنت محجبة صح و لابسة طويل و واسع أنها متعرفش الموضة و لا تعرف تلبس زي بقية البنات . بالعكس البنت دي يتبقي عارفة كويس أوي الموضة و تقدر تلبس زي البنات كلها بس هي اللي مش عاوزة.

.الحقيقة إن البنت دي قوية أوي من جواها و ربنا قدرها أنها تبقي شايفة كل ده حواليها بس فضلت أنها ترضي ربنا علي أنها ترضي الناس اللي حواليها . البنت دي من النوع اللي مرضاش يتحجب حجاب طرحة !!

أصل لما المجتمع اللي حواليها يبقي بيعتبر التمسك بالدين و المبادئ تشدد و رجعية ، يبقي لازم هي تتمسك بمبادئها أكتر و أكتر و تثبت للناس كلها أنها مش رجعية و لا متشددة . لازم تثبت للناس كلها أنها انسانة ناجحة في حياتها و إن التزامها عمره ما كان عائق لنجاحها  ، لازم تثبت للناس كلها إن الالتزام عمره ما كان دليل عالتخلف أو الرجعية بالعكس دة قمة الرقي الفكري انك تحافظي علي نفسك من عيون الناس و متديش لحد الحق انه يشوف حاجات مش من حقه انه يشوفها . لازم تثبتي للناس كلها انك مش مخنوقة من اللي بتعمليه.... بالعكس انت مبسوطة انك بترضي ربنا و فضلتي رضاه علي أي حد .

أصل المشكلة إن فيه ناس كتير مش فاهمة الحكمة من فرض الحجاب عشان لو فهموما مكنوش قالوا عنه انه  تقييد لحريتهم . لو عرفوا إن ربنا عاوز يعزنا و يحمينا و يحافظ علينا ، لو عرفوا إن ربنا بيغير علينا و ميحبش إن حد يبصلنا أو يضايقنا ، لو عرفوا إن أجسامهم دي مش ملكهم و أنها ملك اللي خلقنا و أننا لازم نحافظ عليها و منخليهاش فرجة للناس كلها ، يمكن ساعتها بس يبقي عادي انك تشوف بنت ملتزمة في الشارع و متستغربش و لا تقول عاملة في نفسها كده ليه دي هي متعرفش جيلها بيلبسوا ايه !! يمكن ساعتها منعتبرش اللي بتحط حدود في تعاملها مع الولاد و لا سلوكها ملتزم معقدة و مش عايشة سنها !! 

.حاجة أخيرة أحب أقولها لكل واحدة بتحاول تلتزم في حجابها....لازم تكوني دائما فخورة باللي انت بتعمليه و فخورة بالتزامك مهما الناس عارضتك أو حسستك إن شكلك غريب . جاهدي المجتمع اللي حواليكي و قبل كل ده جاهدي نفسك و إفتكري ديما إن أعظم جهاد هو جهاد النفس !!