عن الصور

و أفضل أسأل نفسي هي ليه صورنا القديمة ليها تأثير كبير علينا كدة.....ليه أما نشوفها ممكن نعيط.....يمكن عشان بتفكرنا بلحظات حلوة نفسنا نعيشها من تاني....و لا يمكن عشان فيهم ناس مبقوش في حياتنا فبيوحشونا أما بنشوف وشوشهم من تاني. ...يمكن بنفتكر أوقات في حياتنا كانت حالتنا أحسن من دلوقتي....و لا يمكن بنتمني نرجع بالزمن لورا قبل ما كننا نضطر نعيش حاجات كتير مكنش نفسنا إننا نعيشها.....
يمكن صورنا و إحنا أصغر بتحسسنا قد أيه الحياة قبل ما نكبر كانت أبسط.....و لا يمكن بنزعل إننا مش عارفين نفرح نفسنا زي ما كننا في الصور دي....
يمكن بنكون بقالنا كتير محتاجين لحظات زي اللي في صورنا....يمكن بنعيط عشان الصور دي لمست إحتياجنا ده و فضحته.....
أوقات كتير بتكون الصور سبب بهجة .... و في الغالب لما بتكون حالتنا قريبة من حالتنا ساعة ما اتصورنا الصور دي أو يمكن أحسن ....أو لما بيكون فيها ناس لسة موجودين في حياتنا و بنفس القرب .....
لكن للأسف ساعات كتير صورنا القديمة بتكون سبب تعب لينا....يمكن بسبب كل الحاجات اللي قلناها....و يمكن بسبب حاجات تانية إحنا نفسنا مش هنبقي فاهمنها....المهم إن الصور مهما إختلف إحساسنا و إحنا بنتفرج عليها فهي ديما بتأكدلنا إننا عيشنا أيام حلوة....حتي لو كانت أحلي من أيامنا اللي عايشنها دلوقتي....فمجرد وجودها في الذاكرة ساعات ممكن يكون سبب كافي إننا نستني نعيش زيها من تاني !