مين قال ان النسيان ديما نعمة؟؟

طول ما أحنا عايشين بنقابل ناس....نحب ناس....و نكره ناس....و ناس بيظهروا في حياتنا عشان يغيروها للأحسن....و ناس تانية بيظهروا في حياتنا مش عشان يكملوا فيها...ﻷ عشان مكنش ينفع نكمل احنا فيها من غير ظهورهم...ظهروا في الوقت المناسب عشان يعلمونا الدرس اللي المفروض نتعلمه قبل ما يجي الوقت المناسب و يختفوا ....
كل واحد فينا ممكن يكون عدا بمواقف في حياته وجعته ....و علمت جامد....و من ساعتها لم تعد الحياة كما كانت قبل ذلك....
بس بيفضل جوانا سؤال محيرنا :طب مدام كل حاجة ليها آوانها اللي مكتوبلها انها تحصل فيه...مآنش الآوان بقي اننا ننسي؟؟ ننسي الوجع و التعب و الناس اللي وجعونا و اللي سابوه جوانا...لسة مآنش الآوان ؟؟ و لا عشان نفسنا ننسي فمش عارفين؟؟ و لا أحنا استحلينا التقليب في الذكريات و مش عاوزين ننسي؟؟ و لا أيه؟؟
الحقيقة أن النسيان بالنسبة لنا عامل زي النوم...مينفعش تغصب نفسك انك تنام و انت عنيك مفنجلة و مصحص...و في نفس الوقت مينفعش تقاوم النوم و انت مش قادر تفتح عنيك من التعب....
مينفعش تغصب نفسك انك تنسي حاجة...و تقول انك هتدوس علي زرار و هتصحي تلاقي نفسك تمام...ببساطة ﻷننا مش نازلنا option ال delete ده....فالموضوع عمره ما بينجح بالغصب...بنبقي بنضحك علي نفسنا عاملين اننا مسحنا الحاجة و هي في الحقيقة معمولها copy في مكان محدش يعرفوا غيرنا.....و علي الرغم من ده فيه أوقات من غير ما نبذل أي مجهود......بنلاقي النسيان جي لحد عندنا... لا أرادي....حياتنا بتاخدنا أوي و بنلاقي نفسنا دخلنا في دوامة الحياة و اتشغلنا عن التفكير في حاجات عدي عليها الزمن و فات .....
بس السؤال بقي هو أحنا بننسي بجد؟؟ و لا مجرد بنتعود علي حياتنا الجديدة فبيعتبر بمثابة نسيان للي فات؟؟
الحقيقة اننا ممكن ننسي أي حاجة...وشوش ...أسامي...أرقام....ذكريات حلوة أو وحشة....أنما بقي في الحاجات اللي بتعلم دي بذات مهما عملنا...بتفضل معلمة...و مهما عدي الوقت... بيبقي مجرد تخفيف من درجة العلامة....بس العلامة عمرها ما بتروح...
و الحقيقة الغريية بقي اللي عمرنا ما فكرنا فيها....ان عدم نسيان بعض الأشياء في حياتنا أحيانا بيبقي  هو النعمة مش نسيانها....ﻷن الوجع اللي اتعرضتله ده و علم جامد و العلامة مش راضية تروح...الهدف منه عمره ما كان انه يعلم جواك فتفضل موجوع طول حياتك....ﻷ الهدف منه انك عمرك ما كنت هتتعلم الدرس ده غير لو عديت بالوجع ده.. .و عشان الإنسان نساي و أي درس بيتعلمه بينساه....حب انه يسيب علامة جواك عشان متنساهوش....مهما عدي الوقت تفضل فاكر الدرس ده عشان متقعش في نفس غلطاتك تاني....
يمكن يكونوا بيقولوا علي النسيان نعمة...و دي حقيقة....ﻷنه بيريح...بيحسسنا اننا رجعنا أطفال من تاني مش شايلين هم حاجة.....بس أوقات كتير مبيبقاش نعمة..لما بيكون مينفعش نرجع أطفال....عشان ساعتها مش هنرتاح...بالعكس هنتوجع من تاني....عشان كدة لازم يفضل جوانا الحاجة اللي بتفكرنا و تبقي جهاز انذارنا .....تقولنا وقت ما نيجي نقع من تاني...."خليك جدع الأول و أنساني"....